(Hapunten anu kasuhun ka para pini sepuh. Dina danget ieu sim kuring nganggo basa Sunda loma tanpa sensor…)

Tilu poe ieu, meh unggal poe kuring nyieun cilok. FYI, cilok teh sabangsaning kadaharan opieun nu dijieun tina aci, wangunna baruleud leutik. Ari cara ngadaharna teu kawas dahareun sejen nu guyub make sendok atawa di comot ku ramo. Tapi dicolok heula ku nyere, tuluy dicocolkeun kana saos atawa sambel suuk, karek am. Nu matak dingaranan cilok ge, da singgetan tina aCI dicoLOK.

Teuing kunaon kuring meni ‘terobsesi’ kieu kana cilok. Meni hayaaaang pisan bisa nyieun cilok nu pangeunahna sadunya. Lain bohong. Padahal lamun dipikir-pikir, hayang cilok mah tinggal meuli di si Emang paporit. Murah, teu kudu gawe ngagaley-ngabuleud-buleud, tinggal mere duit receh, diladangan dengan senyuman (hiih!) terus cingogo sisi jambatan bari nyolok-am…nyolok-am….

Ari sajarah kuring mimiti wawuh ka cilok, asa rada poho. Teuing jaman SMP atawa SMA. Da keur leutik mah tara pernah noel-noel acan. Da teu dikenalkeun ku pun biang. Saurna teh bahaya mun emam cilok mah. Sok e’*’ getih… Nya, sim kuring nu polos keneh teh atuh nurut pisan ka Mamah. Da sieun ** getih. Padahal nu bener mah (jigana) lain ** getih. Tapi ceurik getih. Kulantaran kuring hayang breakfast, lunch, dinner make cilok tapi teu diidinan. Yaa… nangis darah lah guwe. Heuheuy deuhh!

Alhamdulillah, jaman kuliah di Jatinangor baheula euweuh nu jualan cilok. Jadi duit bulanan kuring teu nepi ka jewol kulantaran meulian wae cilok. Ngan upama kuring nyiliwuri ka daerah Monumen Pancasila nu di Jalan Dipati Ukur tea, komo mun keur ngabring jeung babaturan. Siap-siap sajah si Emang hepi. Diborong dong. Tapi untungna kuring saparakanca adalah mahasiswa-mahasiswi yang tida lupa daratan. Jadi keinginan si Emang agar dagangannyah ludes habis dan licin tandas hanyalah angan beliaw semata…

Alatan geus weureu ku kadaharan aheng ala kape jeung restoran, meureun. Kuring bet jadi sering browsing neangan resep-resep jajanan pasar. Geus kapanggih, bandros, sorabi, cireng, misro, cakueh, tapi nu nyangsang dina hate nu pangjerona ngan ukur sakadang cilok. Aya sababaraha resep. Ku kuring dicobaan hiji-hiji. Trial n error we. Tapi nepi ka ayeuna can aya nu nyugemakeun. Aya nu alus bentukna, tapi rasana ancur. Aya nu geus rada ngeunah, tapi hese pisan ngabuleud-buleudna, nepi ka buyatak dioprek. Aya nu liaaaat pisan, matak coplok sihung.

Ayeuna kuring rek ngarenghap heula. Sahenteuna saminggu kahareup, kuring moal waka ngulik resep cilok heula. Keur lendeng yeuh. Resep nu kakara dipraktekkeun tadi teu ngeunah. Liat teuing, jeung cebrek euweuh sarian. Jadi rieut kana sirah. Jeung deui bisi kurang giji, hayoh wae cacamuilan daharan cilok. Enya beuteung seubeuh, tapi uteuk jadi hampos.

Cag heula. Tapi… kela ah. Rek curat-coret heula make pilok yeuh dina tembok. Yuu ah, yuuu. Ngagrapiti…

Cilok, I’m yours.
Let’s vote for Cilok.
Cilok is the best.
Bad or good, Cilok is my holy-food.
Forever in Cilok.
Cilok is never end.
I’m crazy about Cilok.
Cilok, mwwwaaahhhh..mwwaaaahhh!!!
Ciloxers.
Ratna lope Cilok.
Great big hug for my Cilok.